Kreu i Partisë Demokratike, Sali Berisha, gjatë një bashkëbisedimi me qytetarët në rrjetet sociale, ka përsëritur thirrjen drejtuar partive të reja opozitare për t’u bashkuar me PD në aksionin kundër kryeministrit Edi Rama.
Berisha theksoi se PD do të angazhohet maksimalisht për të arritur këtë bashkim, ndërsa u bëri apel edhe shtresave të ndryshme të shoqërisë shqiptare, përfshirë shoqërinë civile, intelektualët, studentët dhe pensionistët.
“Ne nuk heqim dorë kurrë nga protestat. Do të bëjmë gjithçka për t’u bashkuar me forcat e tjera opozitare. Është koha të bashkohemi kundër një kundërshtari të ashpër. I bëj thirrje shoqërisë civile që ka mbetur jashtë kontrollit të Edi Ramës të bashkohet me ne. I bëj thirrje intelektualëve të dalin nga konformizmi, pasi kjo është shkatërrimtare”, u shpreh Berisha.
Kjo thirrje vjen në një moment kur brenda PD janë ndërmarrë hapa për përjashtimin e anëtarëve që kanë shprehur qëndrime kundër tij. Një vendimmarrje e tillë jo vetëm zvogëlon akoma më shumë partinë dhe nuk bashkon demokratët, por humb besimin për ta mbështet një parti e cila nuk ndryshon shumë nga ajo e Ramës. Nga ana tjetër shton arsyet që partitë e reja opozitare mos t’i bashkohen protestave të tij, duke qenë se më herët janë shprehur kundër çdo bashkëpunimi me Sali Berishën.
Megjithatë, kryedemokrati ritheksoi se nuk do të tërhiqet nga protestat, duke lënë të hapur edhe mundësinë e përshkallëzimit të tyre në vijim deri në “kilometrin e fundit”.
