Mbrëmë, pak orë pasi Gjykata Kushtetuese rrëzoi çdo shpresë për zgjedhje të parakohshme në Bashkinë e Tiranës, Ilir Alimehmeti reagoi publikisht në Facebook me një mesazh të shkurtër: “Mirëmbrëma miq, nuk ndalemi”. Në foto, ai shfaqet krah Florian Binajt, kandidatit të pavarur që u mbështet nga disa parti të opozitës në garën e planifikuar nga Edi Rama për Tiranën.
Pas spostimit të Belind Këlliçit nga drejtimi politik i PD-së për Tiranën, Alimehmeti ka marrë rolin e përfaqësuesit të strukturave demokratike në kryeqytet. Dhe mesa duket, zgjedhja për t’u rreshtuar sërish krah Binajt sinjalizon jo vetëm afrimin e tyre politik, por edhe ambicien e Alimehmetit për të mbetur një faktor në betejën e ardhshme lokale, e parashikuar pas rreth një viti e gjysmë.
Megjithatë, pyetjet ngrihen natyrshëm: A beson realisht Alimehmeti se Partia Demokratike do të zhvillojë një garë të hapur për kandidatin e saj në Tiranë? Apo ky është më shumë një deklarim entuziazmi politik, i lindur nga momenti dhe i destinuar të zbehet përballë realpolitikës së PD-së, ku shpesh vendimet kryesore merren larg procesit të primareve?
Pas përjashtimit të tij nga gara me Erion Veliajn në primaret e fundit, një vendim që i hapi rrugë kandidimit të Belind Këlliçit si i preferuar i Sali Berishës, Alimehmeti duket se vijon të kërkojë hapësirën e tij politike në kryeqytet. Ndërsa Binaj, me profilin e tij si figurë e re dhe e pavarur, mbetet alternativë e afërt e Alimehmetit në një opozitë të fragmentuar.
Në fund, mbetet për t’u parë nëse ky pozicionim është fillimi i një projekti të ri politik për Tiranën, apo vetëm një kapitull tjetër i tensionit të brendshëm të opozitës për kandidaturat dhe drejtimin e saj.
