VNA ka vendosur të mos raportojë asnjë reagim nga politika për vrasjen e gjyqtarit Astrit Kalaja. Të majtë dhe të djathtë, qeveri dhe opozitë, kanë së bashku kulturën e të sulmuarit të prokurorëve dhe gjyqtarëve që nuk i shkojnë pas fijes politikave të tyre.
Gjyqtarët dhe prokurorët nuk janë engjëj dhe sigurisht që edhe ata gabojnë në punën e tyre të përditshme. Por sulmet ndaj tyre, të frymëzuara nga politika, janë në pjesën dërrmuese të rasteve garanci për krimin dhe jo vetëm për t’i sulmuar ata edhe fizikisht. Ngjarja e sotme patjetër që është më e renda e viteve të fundit dhe përgjegjësia për të bie së pari mbi autorin e ngjarjes. Por lotët e krokodilit të politikës shqiptare nuk e fshehin dot përgjegjësinë e politikës, që kurrë nuk është ndalur së sulmuari, sharë dhe anatemuar prokurorë e gjykatës që i kanë prishur terezinë.
Ndaj, bashkë me ngushëllimet për familjen e Astrit Kalasë, do të ishte mirë që politika të heshtte e të drejtonte gishtin nga vetja — si përgjegjësja e vetme për situatën ku është sot siguria e vendit, katandisjen e drejtësisë në vetëgjyqësi dhe të ndalë njëherë e përgjithmonë gjuhën agresive dhe sulmet ndaj institucioneve të drejtësisë, prokurorëve dhe gjyqtarëve.
