Pas njoftimit të qeverisë se nga sot hyn në fuqi rritja me 2.5% e pensioneve, ka ardhur një reagim nga kryetari i Lëvizjes “Bashkë”, Arlind Qori.
Ai e konsideron këtë indeksim si tallje ndaj pensionistëve shqiptarë, të cilët sipas tij janë ndër më të varfrit në Europë.
“Edi Rama tallet me pensionistët. Me 2.5% rritje, pensionisti me pension minimal merr më pak se 3 mijë lekë të vjetra më shumë në muaj, dhe ai me pension mesatar vetëm 4 mijë lekë të vjetra. Kjo do të thotë dy shishe qumësht ose dy shishe kos më shumë në muaj,” – deklaron Qori.
Sipas tij, në një vend ku një pensionist nuk mund të jetojë vetëm me pensionin e tij, nevojiten masa të forta sociale dhe vendosja e minimumit jetik.
“Edi Rama ka premtuar se pensioni mesatar do bëhej 400 euro. Që kjo të ndodhte, duhej rritje të paktën 50 euro çdo vit. Në vend të kësaj, na jep 3-4 euro. A jeni gati të protestoni, të kërkoni hakun për mundin dhe punën tuaj?” – apelon Qori drejtpërdrejt për mbi 700 mijë pensionistët në vend.
