Kryeministri Edi Rama në emisionin “Opinion” tregoi një tjetër mënyrë që do të kontribuojë në pastrimin e Shqipërisë nga mbeturinat. Ai tha se një nga masat që po merr qeveria, është që do vendos kamera në qytete dhe ato do të regjistrojnë se kush qytetar hedh plehrat në tokë.
“Edhe për këtë i kemi ilaçet e reja. Ilaçet e reja janë që gjatë mandatit që fillon për pak ditë ne do fillojmë t’i implementojmë, se i kemi bërë gati do fillojmë zbatimin e projektit të qyteteve inteligjentedhe të monitorimit të rrugëve për monitorimin me kamera. Për të parë se kush i hedh mbeturinat me kamera”, u shpreh Rama.
Madje kryeministri shkoi më tej duke thënë se kamera do vendosen edhe në shkolla. Këto sipas tij do të shërbejnë që fëmijët mos të kopjojnë në provim.
“Dhe në qytet ne do shohim çdo gjë. Do shohim edhe kush hedh plehra, do shohim edhe kush merr pjesë në mësim dhe kush nuk merr pjesë në mësim. Do shohim edhe kush kopjon në provim dhe kush nuk kopjon në provim, deri në klasë. Që prindërit të shohin fëmijën dhe kur zihen fëmijët ose kur ka ndonjë problem, ose kur mësuesi thotë e kam kapur me kopje t’ia tregojë ja ku e ke fëmijën”, tha më tej kryeministri.
Pra, me pak fjalë patronazhimi tashmë do kalojë edhe me kamera për të gjurmuar qytetarët kur hedhin mbeturinat dhe në këtë formë Shqipëria do të jetë më e pastër. Kujtojmë se kjo është reforma e radhës që qeveria po mendon për të pastruar Shqipërinë, pasi ajo me satelitet që do kapnin qytetarët duke hedhur plehra apo që ndërtojnë pa leje nuk ka funksionuar.
