Partia Mundësia ka nisur përgatitjet për zgjedhjet e ardhshme vendore, duke filluar procesin e përzgjedhjes së kandidatëve për kryetarë bashkish dhe për këshilltarë bashkiakë.
Kjo forcë politike pritet të garojë e vetme, me kandidatët e saj në të gjitha bashkitë e Shqipërisë. Kryetari Agron Shehaj u ka bërë thirrje qytetarëve që duan të përfshihen në politikë t’i bashkohen kësaj force dhe të marrin pjesë në procesin e përzgjedhjes së kandidatëve.
“Ne do të jemi prezentë në të gjitha bashkitë e Shqipërisë me kandidatët tanë për kryetarë bashkish dhe për këshilltarë bashkiakë. Sot kemi filluar edhe takimet me kandidatë dhe me qytetarë që duan të na afrohen dhe të bëhen pjesë e garës për bashkitë në të gjithë Shqipërinë. Pres nga secili prej jush që të vijë, të propozohet dhe të na bashkohet. Kemi nevojë për mbështetjen e të gjithëve. Na duhen pothuajse 1600 kandidatë për këshillat bashkiakë”, shprehet Shehaj në videon e publikuar në rrjetet sociale.
Thirrja e tij u bë pas një takimi me koordinatorët e partisë në të gjithë vendin, të cilët më herët kontribuuan në mbledhjen e rreth 100 mijë firmave në mbështetje të drejtësisë dhe luftës kundër korrupsionit.
