Kur u mendua se procesi zgjedhor ishte mbyllur përfundimisht, Partia Demokratike ka vendosur të ndërmarrë një hap të ri ligjor duke e çuar në Kolegjin Zgjedhor vendimin e Komisionit Rregullator, i cili shpalli rezultatin final të zgjedhjeve të 11 majit.
Burime pranë selisë blu thonë se në fillim të javës së ardhshme juristët e Partisë Demokratike do të dorëzojnë padinë në gjykatën zgjedhore, duke kundërshtuar vendimin që rezultatin zgjedhor. Më 28 gusht, Komisioni Rregullator miratoi shpalljen e rezultatit me tre votat e anëtarëve të përzgjedhur nga mazhoranca, ndërkohë që dy anëtarët e opozitës, Muharrem Çakaj dhe Helga Vukaj, refuzuan ta mbështesin procesin. Ata e cilësuan të njëjtë me qëndrimin e Partisë Demokratike, duke e quajtur farsë zgjedhjet e 11 majit dhe duke akuzuar Komisionerin Shtetëror të Zgjedhjeve, Ilirjan Celibashi, për dy standarde në trajtimin e dorëheqjeve të kandidatëve të mazhorancës krahasuar me ata të partive të reja.
Sipas këtij zhvillimi, padia e Partisë Demokratike mund të shtyjë disi dekretin e Presidentit Bajram Begaj për thirrjen e Kuvendit të ri, por nuk e bllokon dot procesin, pasi Kolegji Zgjedhor ka afat deri më 10 shtator për të dhënë vendimin përfundimtar mbi vlefshmërinë e zgjedhjeve parlamentare të 11 majit.
