Më 10 shtator pritet të jetë seanca e parë plenare dhe Sali Berisha si deputeti më i vjetër në Kuvend, i takon të hapë mbledhjen.
I pyetur sot nga mediat nëse do të pranojë hapjen e seancës parlamentare, kryetari i Partisë Demokratike Sali Berisha tha se nuk do pranojë dhe se nuk mund t'i bëjë Shqipërisë këtë antishërbim.
"Një parlament jolegjitim nuk mund t'a hapë kurrë. Nuk mund t'i bëj vendit tim një antisherbim të tillë. Harroje! Po të ishte legjitim, me kënaqësi do t'a bëja. Do t'a kisha patur kënaqësi. Por ky është Parlament jolegjitim. Nuk përfaqëson vullnetin e qytetarëve shqiptarë sipas të gjitha dokumentave kombëtare dhe ndërkombëtare.
Është rekomandimi i KiE "Në Shqipëri duhet të ndahet partia nga shteti". Kaq mjafton, vetëm kjo frazë për të treguar që ky është parlamenti i partisë shtet. E si mund t'ja lejojë vetes të ulen aty?!"-tha Berisha për gazetarët në një konferencë për mediat.
Pas tij, emri i dytë më i vjetër në Kuvend është deputeti Tritan Shehu. Për të cilën gazetarët ri pyetën Berishën nëse deputeti i PD do pranojë të hapë. Por kreu i selisë blu tha se nuk ka komunikuar me të.
