Parlamenti është mbledhur sot në dy seanca të veçanta, por më shumë sesa për diskutime apo vendime të rëndësishme, sytë janë kthyer nga lëvizjet, pamjet dhe debatet jashtë agjendës zyrtare.
Deputetët kanë mbërritur njëri pas tjetrit në Kuvend, në një atmosferë që i ngjante më shumë një parade politike sesa një ditë pune intensive.
Një nga kthimet më të përfolura ishte ajo e Jozefina Topallit, e cila pas shumë vitesh mungesë në skenën parlamentare, u shfaq sot në sallë. Ish-kryetarja e Kuvendit u pa e buzëqeshur dhe në humor të mirë, pavarësisht zhurmës mediatike të ditëve të fundit rreth dasmës luksoze të djalit të saj në Romë — një ngjarje që ka ndezur debat në rrjete sociale dhe media.
Nga ana tjetër, tensionet nuk munguan. Një ndër momentet më të spikatura u regjistrua gjatë daljes nga salla, ku deputetja Mesila Dodaj u përplas verbalisht me Ulsi Manjën. Debati mes tyre, i cili u zhvillua në sy të kolegëve dhe kamerave, tregoi edhe një herë klimën e tensionuar që shpesh karakterizon skenën politike shqiptare.
Fotot e mëposhtme dokumentojnë momentet e daljes së deputetëve nga salla — një përzierje stili, mimike dhe ndonjë tensioni politik që e bëjnë Parlamentin sot më shumë një skenë spektakli sesa një institucion vendimmarrës.
Paradë? Pa dyshim. Punë? Pak.
