I ftuar në emisionin “Kjo Javë” në News24, Edi Paloka, deklaroi se PD prej 12 vitesh është “gati për të marrë pushtetin”, por sipas tij ndodhet në një opozitë të imponuar.
Paloka u shpreh se presioni dhe represioni i pushtetit ka ndikuar drejtpërdrejt tek strukturat e PD-së, ndërsa mijëra anëtarë janë larguar nga vendi nga lodhja, dëshpërimi apo vështirësitë e opozitës.
Sipas tij, ka edhe persona që janë larguar nga PD për shkak të “joshjeve të Ramës” me punësime, leje ndërtimi apo projekte turistike.
“PD është prej 12 vitesh gati të marrë pushtetin por jemi në një opozitë të imponuar.
Kur them nuk jemi në situatën më të mirë, e kam fjalën pikërisht për faktin që jemi në opozitë të imponuar nga pushteti diktaturë, që bën represion. Nën këtë diktaturë për 12 vite nuk është e lehtë, ndaj jemi në këtë situatë sot.
Mjafton të shohim strukturat, mijëra anëtarë të PD janë larguar fare nga Shqipëria, një pjesë nga dëshpërimi dhe lodhja largohen , dalin anash, opozita është e vështirë nuk rezistojnë dot të gjithë.
Ka edhe nga ata që kanë iku sepse i ka joshur Rama. Me punë, leje ndërtime apo fshatra turistike. Janë fakte publike por do të vijë dita që do të flas edhe me emra.
Është domosdoshmëri riorganizimi i PD. Duhet mbase të ndryshojmë strukturën dhe skemën, por kjo nis në bazë. Nuk është zgjidhje problemesh nëse heq X apo vë Y në kupolën e PD. Nuk shoh krizë përfaqësimi”, tha ai.
