Deputeti i Partisë Demokratike, Belind Këlliçi, deklaroi në News24 se brenda dy ditësh kryeministri mund të thërrasë Asamblenë e PS për të bërë një “makiazh” në qeveri, në mënyrë të ngjashme me atë që, sipas tij, ndodhi në vitin 2017 me largimin e disa ministrave.
Sipas Këlliçit, lëvizja do të kishte si synim shmangien e zbatimit të masave të SPAK, duke larguar përkohësisht nga posti zëvendëskryeministren dhe ministren, por pa i cenuar imunitetin. “Duke garantuar se nuk zbatohet masa e SPAK, e largon nga zv.kryeministrja dhe ministrja dhe i mban në këtë formë imunitetin, duke i garantuar paprekshmërinë për sa kohë Rama është kryeministër, sepse sot ai është peng i Ballukut”, u shpreh ai.
Në deklaratën e tij, Këlliçi bëri edhe një krahasim me vitin 2017, duke përmendur rastin e Saimir Tahiri, për të cilin tha se u realizua një riformatim qeveritar paralelisht me zhvillimet hetimore të kohës.
Deklaratat e deputetit demokrat ngrejnë një tjetër debat: a po ndërton opozita një strategji politike të mbështetur në agjendë dhe alternativa konkrete, apo po pozicionohet në pritje të lëvizjeve të Edi Rama, duke reaguar mbi informacione informale dhe parashikime politike?
Nga ana e mazhorancës nuk ka ende një reagim zyrtar mbi këto pretendime. Nëse do të ketë apo jo një mbledhje të Asamblesë së PS dhe një riformatim qeverie në ditët në vijim, mbetet për t’u parë.
