Seanca maratonë e sotme në Kuvend, e dedikuar projektbuxhetit dhe paketës fiskale për vitin 2026, nisi me tensione dhe një koreografi të re proteste nga Partia Demokratike. Në momentin kur kryeministri Edi Rama mori fjalën, deputetët e opozitës u ngritën dhe i kthyen shpinën foltores, duke e shoqëruar këtë me reagime verbale dhe ndërhyrje të shpeshta nga vendet e tyre.
Ky ishte një akt i synuar për të shprehur kundërshtimin ndaj politikave të qeverisë dhe për ta cilësuar projektbuxhetin si mashtrues dhe të shkëputur nga realiteti ekonomik. Deputetët e PD-së vijuan me komente, replikime dhe thirrje, duke ndërprerë vazhdimisht fjalën e kreut të qeverisë.
Rama reagoi menjëherë, si zakonisht me ironi, duke iu drejtuar Flamur Nokës me epitetin “Besnik Flamur Noka”, në aludim për besnikërinë e tij ndaj Sali Berishës. Ai e krahasoi gjithashtu me Shefqet Peçin, deklaratë që provokoi replika dhe kundërpërgjigje të forta nga opozita.
Gjatë seancës, në Kuvend ishte e pranishme edhe zëvendëskryeministrja Belinda Balluku — hera e parë që ajo merr pjesë në një seancë plenare që prej shpalljes së saj të pandehur nga SPAK për çështjen e Tunelit të Llogarasë. Prania e saj u vu menjëherë re nga deputetët, ndërsa tensioni mes dy kampeve politike vazhdoi pa u zbehur.
Mazhoranca e cilësoi veprimin e PD-së si një performancë të radhës, ndërsa opozita e mbrojti si mënyrën e vet për të denoncuar “gënjeshtrat dhe abuzimet e qeverisë”.
Seanca pritet të zgjasë për orë të tëra, me debate, ndërprerje dhe përplasje verbale, teksa diskutimi për buxhetin e vitit 2026 po zhvillohet në një atmosferë të nxehtë politike dhe retorike përplasjesh të pritshme nga të dyja frontet.
