Prej javësh në Parlament ishte e qartë se përplasja mes mazhorancës dhe opozitës kishte arritur në një pikë ku rrugët e komunikimit politik po mbylleshin një nga një. Sot, ajo përplasje kaloi zyrtarisht në derën e Gjykatës Kushtetuese.
38 deputetë të opozitës dorëzuan një kërkesë të përbashkët, duke i kërkuar Kushtetueses të ndërhyjë atje ku, sipas tyre, shumica socialiste ka përdorur votat për të bllokuar një të drejtë që Kushtetuta e quan të patjetërsueshme: ngritjen e komisioneve hetimore.
Në thelb, kërkesa ka dy qëllime. Së pari, t’i detyrojë Kuvendit hapjen e dy hetimeve që mazhoranca i rrëzoi pa diskutim: dosja “McGonigal”, ku kërkohet verifikimi i veprimeve të zyrtarëve shqiptarë në raport me ish-agjentin e FBI-së, dhe hetimi për përdorimin e burimeve shtetërore në zgjedhjet e 11 majit 2025. Së dyti, të shpallë antikushtetuese vendimet e Kuvendit që i mbyllën dyer këtyre nismave.
Në kërkesë, deputetët e opozitës përshkruajnë një realitet që, sipas tyre, është shndërruar në praktikë të përditshme: mocionet nuk pranohen, interpelancat nuk zhvillohen, seancat dëgjimore nuk lejohen dhe çdo kërkesë e opozitës për kontroll parlamentar përfundon në kosh me kartonat e shumicës.
Ata flasin për një Kuvend që po rrëshqet drejt logjikës njëpartiake, ku prania e opozitës është thjesht një dekorim i domosdoshëm, jo një aktor funksional i kontrollit ndaj qeverisë. Më shumë se një ankesë politike, kërkesa e tyre e çon këtë debat në terrenin e garancive kushtetuese, duke iu drejtuar organit të vetëm që mund të përcaktojë nëse mazhoranca ka tejkaluar apo jo vijat e kuqe.
Në dokumentin e dorëzuar, argumenti kryesor është i qartë: e drejta e pakicës për të ngritur një komision hetimor nuk varet nga vullneti i shumicës. Ajo nuk negociohet, nuk kushtëzohet dhe nuk mund të rrëzohet me votë politike.
Kushtetuesja tani duhet të vendosë jo vetëm për fatin e dy komisioneve, por edhe për kufirin e madh që ndan kontrollin parlamentar nga abuzimi me shumicën. Ndërkaq, përplasja mes dy kampeve politike pritet të ashpërsohet, ndërsa Kuvendi mbetet i paralizuar në funksionet që, sipas opozitës, nuk i ushtron dot më.
