Aleati i Partisë Demokratike, Fatmir Mediu, nuk është dakord që kandidatë për Bashkinë e Tiranës të jenë Jorida Tabaku apo Ilir Alimehmeti. Sipas tij, emri i kandidatit duhet të jetë një person që tejkalon kostumin politik dhe është pranë qytetarëve.
“Duhet të përfshijë qytetarët kundër së keqes, ndaj duhet të gjejmë një kandidat gjithëpërfshirës. Duhet të flasim për një kandidaturë që i kapërcen kufijtë politikë. Duhet të jenë njerëz që tejkalojnë kostumin politik dhe janë pranë qytetarëve. Nuk do të isha pro… Për Tabakun dhe Alimehmetin kam konsideratë, por situata do të lokalizohej më shumë”, tha Mediu.
Megjithatë, ky konkluzion i kreut të PR-së vjen në një kohë kur të dy emrat më të votuar në listën e PD-së në zgjedhjet e 11 majit nuk kanë shprehur dëshirë për të kandiduar për Bashkinë e Tiranës. Tabaku, deri më tani, i ka kaluar zërat në heshtje, pa shfaqur interes për këtë propozim. Ndërsa Alimehmeti e ka refuzuar kategorikisht, duke u shprehur se është i gatshëm të kandidojë vetëm në zgjedhjet e vitit 2027 për Tiranën.
Prandaj, argumenti i Mediut për këto dy emra duket më shumë si një justifikim për situatën e opozitës, e cila ende nuk po arrin të gjejë një kandidat, qoftë edhe me vullnet personal, përballë Ogerta Manastirliut.
