Tre të mandatuarit e Berishës për negociatat, Belind Këlliçi, Ilir Alimehmeti dhe Flamur Noka, sot në mesditë pritet të takohen fillimisht me kreun e Partisë Republikane, Fatmir Mediu, dhe kreun e Partisë Agrare Ambientaliste, Agron Duka. Se ç’mund të diskutojnë këta mes tyre për kandidaturat mbetet një pikëpyetje e madhe, veçse nëse kanë vendosur të bëjnë thjesht muhabet me njëri-tjetrin.
Fatmir Mediu dhe Agron Duka kanë 0 peshë elektorale. Ndërkohë nesër “delegacioni” pritet të zhvillojë takime me drejtuesit e Partisë së Lirisë, ndërsa gjatë javës së ardhshme janë planifikuar takime edhe me Agron Shehajn, Adriatik Lapajn dhe Arlind Qorin.
Megjithatë, nuk dihet nëse ky i fundit do të jetë pjesë e bisedimeve, pasi vetëm një ditë më parë, në një prononcim në Facebook, Arlind Qori deklaroi se Lëvizja BASHKË do të kandidojë në zgjedhjet për kryetar bashkie në Tiranë, duke iu përmbajtur karakterit të saj dhe pa ua vënë veshin “sirenave që na ftojnë dorë për dore në fund të detit.”
