Nis seria e vetëpërjashtimeve edhe në PS. VNA mëson se sot, gjatë mbledhjes së grupit parlamentar të PS, Edi Rama i është drejtuar me nota të ashpra edhe Elisa Spiropalit. “Ke postuar dy herë në FB kundër nesh”, mësohet të ketë thënë kryeministri, ndërsa e ka paralajmëruar se herën e tretë do të përjashtohet.
Ndër të tjera, Rama e ka paralajmëruar Spiropalin duke i thënë: “Mos krijo drama në parti.”
Ai ka shtuar gjithashtu: “O me ne, o përballë nesh. O jemi grup, o nuk jemi.”
Ndërkohë, vetë Elisa Spiropali ka kërkuar të replikoje me Edi Ramën pas këtyre akuzave të tij, ndërsa ky i fundit i është përgjigjur: “Replikë po bëj unë mbi çarçafin tënd. Merr frymë dhe kupto ç’po bën.”
Pakënaqësitë publike të Elisa Spiropalit erdhën menjëherë pas shkarkimit të saj si ministre e Jashtme. Që nga ai moment, ajo ka bërë disa postime duke shigjetuar drejtimin e qeverisë dhe kryesisht Belinda Ballukun, ndonëse nuk e ka përmendur asnjëherë emrin e saj.
Pritet të shihet tani se çfarë do të ndodhë me disiplinën e hekurt të PS dhe pakënaqësitë e Elisa Spiropalit.
