“Nuk mund të jem kryeministri i një vendi që ka më shumë të paraburgosur se njerëz të dënuar me vendim gjykate.”
Kjo ishte fjalia më e përsëritur e Edi Ramës në konferencën e sotme për shtyp, përmes së cilës ai dha mesazhin se reforma në drejtësi ka probleme që kanë nevojë për korrigjime.
Në këtë mënyrë, kryeministri la të hapur shtegun për ndryshime dhe ndërhyrje, ndonëse nuk foli për masa konkrete, ndërsa nuk e kurseu as dozën e kritikave. Me shqetësimin për brutalitetin dhe vrazhdësinë e shkeljes së të drejtave të njeriut, Rama renditi disa shifra të qeverisë që, sipas tij, faktojnë dorën e rëndë të Prokurorisë së Posaçme në masat e paraburgimit.
Me këtë rast, ai nuk la pa përmendur as masat e sigurisë ndaj bashkëpunëtorëve të tij të afërt, duke thënë se, edhe pse nuk komenton masën ndaj Ballukut, kjo nuk do të thotë se SPAK nuk ka ndërhyrë në këtë rast në punët e ekzekutivit.
Në konferencën e fundvitit, drejtësia ishte boshti qendror, që zuri rreth 80% të kohës dhe rëndësisë së trajtuar. Kjo u reflektua edhe në qetësinë e Edi Ramës, e cila dukej e prishur sa herë që përmendej SPAK dhe qeveria së bashku.
Lidhur me idenë se SPAK mund të konsiderohet si opozita e vërtetë e qeverisë Rama, kryeministri tha se “SPAK nuk është opozita e qeverisë, është institucion i ri, i krijuar falë vullnetit të kësaj force qeverisëse, i mbështetur nga ne, i garantuar nga kjo forcë qeverisëse, në sensin që të tjerë janë betuar që do ta shkrinin, por nuk e shkrinë dot sepse votat i kemi ne. Është institucion që bën punën e vet. Nuk është opozitë e qeverisë, por depresioni i thellë në të cilin ndodhet opozita politike bën që puna e SPAK të jetë e vetmja pikë referimi e opozitës depresive për të goditur qeverinë”, u shpreh Rama.
