Një ditë pasi deklaroi se nuk e mbante mend nëse kishte hipur ndonjëherë në një makinë me biznesmenin Artur Shehu, kreut të PD-së, Sali Berishës, i është kthyer kujtesa, duke mohuar sot kategorikisht një gjë të tillë. Megjithatë, ai shtoi se edhe mund të kishte qenë në një makinë me të, pasi sipas tij, Artur Shehu i vitit 1998 është ndryshe nga ai i sotmi, i cili sipas tij, përfiton favore nga Edi Rama.
Megjithatë, kreu i PD-së nuk dha një përgjigje lidhur me deputetin demokrat të Vlorës, i cili është mik i ngusht i biznesmenit në fjalë.
“Dje më pyete: ‘A ke hipur në makinën e Artur Shehut kur ke shkuar në Vlorë në ’98-ën?’ Absolutisht jo. Edhe është e dokumentuar. Por edhe mund të kisha hipur, sepse Artur Shehu i ’98-ës dhe Artur Shehu i mëvonshëm janë si dita me natën, si Edi Rama me Ismail Qemalin. Di që është nga një familje e persekutuar, më kanë thënë se është një familje e mirë. Por emri i tij u shfaq me Gjeneral Lisin dhe Don Agacion (Engjëll Agaçi) në një operacion perfekt mafioz. Gjeneral Lisi mori 30 hektarë nga Artur Shehu; një fondacion që e kishte rregulluar si familjar, ia kishte dhuruar, kishte ngelur dhe e kishte dhënë me Agaçin, e pastaj bëri burg. Dhe çfarë tha ai? ‘Artur Shehu ma solli Agaçin.’ Unë nuk kam dijeni për ndonjë lidhje me ndonjë deputet”, u shpreh Berisha.
Është përfolur se deputeti demokrat i Vlorës, Bujar Leskaj, është ura lidhëse në këtë marrëdhënie. Leskaj njihet gjerësisht për miqësinë e tij me Shehun dhe për afërsinë e të dyve me Partinë Demokratike. Ndoshta për këtë arsye, Berisha është treguar i kujdesshëm në deklaratat e tij, ashtu siç bëri edhe sot.
