Ervin Salianji ka reaguar pas deklaratave të kryetarit të Partisë Demokratike, Sali Berisha, duke kundërshtuar pretendimin se është “vetëpërjashtuar” nga partia dhe duke ngritur një sërë pyetjesh mbi proceset e brendshme në PD.
Salianji thotë se çështja kryesore nuk është përjashtimi i individëve, por mungesa e garës dhe e votës së lirë për demokratët.
“Kush ka lidhje dhe me kë do kemi kohë e do t’i qartësojmë, por pyetjet mbeten: a do të ketë garë të hapur? A do të ketë votë të lirë për demokratët? Si do fitojë Partia Demokratike? Kur? A mbahet përgjegjësi për rezultatet dhe premtimet? A mundet një kandidat të përjashtojë kandidatin tjetër?” shprehet ai.
Sipas Salianjit, në mungesë të garës po krijohen justifikime për situatën në parti.
“Se në mungesë të garës, shpiken romane me ‘vetëpërjashtime’. Unë nuk jam vetëpërjashtuar nga askund. Përkundrazi, kam qenë dhe jam pjesë e Partisë Demokratike, me kontribut, sakrifica deri në burg politik, me përballje reale dhe fitore për demokratët,” deklaron ai.
Ai thekson se problemi nuk është se kush përjashtohet nga partia, por pse nuk lejohet gara.
“Problemi nuk është kush ‘përjashtohet’, por pse nuk lejohet gara, sepse Sali Berisha apo kushdo tjetër mund të thotë çfarë të dojë për mua, por nuk mund të shmangë pyetjen kryesore: pse i trembet garës?” shton Salianji.
Në reagimin e tij, ai kërkon që në PD të respektohen rregullat dhe vota e anëtarësisë.
“Unë kërkoj vetëm një gjë: rregulla dhe votë. Këtë kërkojnë demokratët, shoqëria dhe partnerët. Pjesa tjetër është propagandë për të mbuluar frikën,” përfundon Salianji.
