Ervin Salianji, edhe pse ishte sot në protestën e organizuar nga PD, duket se nuk do të jetë për gjatë në strukturat e partisë. Të paktën ky është vendimi i sekretarit të përgjithshëm Flamur Noka, i cili menjëherë pas protestës kundër qeverisë ka vendosur të largojë Salianjin nga grupi i WhatsApp-it të kryesisë së PD.
Edhe pse zyra e shtypit e kësaj partie u kujdes të shpërndante titullin: “Berisha fton të gjitha partitë dhe faktorët opozitarë në një front antiqeveri”, ka mjaftuar mbyllja e protestës që Ervin Salianji të përjashtohej, si fillim nga chati i kryesisë e më tej, me gjasë, zyrtarisht edhe nga forumet, siç e ka paralajmëruar në fakt kryetari i PD-së, i cili në daljet e fundit publike nuk e ka fshehur bezdisjen dhe shqetësimin nga takimet e fundit në Gjirokastër, Durrës dhe Elbasan.
Këto lëvizje përçarëse brenda PD vijnë në kohën kur qeveria e Edi Ramës po kalon krizën më të rëndë të saj që prej ardhjes në pushtet në vitin 2013, ndërkohë që PD është e telendisur nga përçarjet dhe opozita e gjatë.
Ata që sot dolën në shesh me pretendimin se do ta rrëzonin Ramën me revoltën e tyre popullore dhe nuk do të lëviznin nga sheshi deri në rrëzimin e regjimit, të paktën ia dolën që, në mos armikun e vërtetë, atë të brendshmin ta qeronin nga radhët e tyre. Ramën vërtet nuk e hoqën dot nga zyra, por me Salianjin i mbyllën llogaritë.
