Lëvizjet politike nga opozita drejt mazhorancës vijojnë të shtohen. Ish-deputetja e Partisë Demokratike, Zheni Gjergji, është emëruar së fundmi Drejtoreshë e Spitalit Rajonal të Elbasanit, një pozicion ky me peshë në administratën publike shëndetësore.
Gjergji ka qenë pjesë e Kuvendit të Shqipërisë në mandatin e kaluar, pasi u zgjodh deputete nën siglën e Partisë Demokratike në zgjedhjet parlamentare të vitit 2021. Megjithatë, në zgjedhjet e fundit ajo nuk ishte pjesë e listave të kandidatëve të PD-së, çka sinjalizoi një distancim të saj nga strukturat aktuale të partisë.
Ky zhvillim vjen në një kohë kur Partia Socialiste duket se po forcon radhët e saj përmes përfshirjes së ish-përfaqësuesve të opozitës në administratë dhe për të dobësuar më tej kundërshtarin kryesor politik të saj. Emërimi i Zheni Gjergjit ndjek rastet e ngjashme të ndodhura në Tiranë dhe në Vlorë, ku figura të tjera të opozitës i janë bashkuar PS-së, ose janë integruar në funksione shtetërore të drejtuara nga kjo forcë politike.
