Deputeti britanik Nigel Farage ka provokuar sërish kryeministrin Edi Rama, ku kësaj radhe është shprehur se do të takohet me kreun e qeverisë shqiptare për një drekë, ku tema kryesore do të jetë deportimi i kriminelëve të huaj, një çështje që ai e cilëson si kërcënim për sigurinë kombëtare të Mbretërisë së Bashkuar.
“Ne do të deportojmë kriminelë të huaj. Do të shkoj për drekë pas disa javësh me kryeministrin e Shqipërisë. Mund të rezervoj një avion shumë të madh dhe të marr një ngarkesë me vete, nuk jam i sigurt ende. Ne do ta ndalojmë atë që është një kërcënim për sigurinë tonë kombëtare, atë që është një rrezik për vajzat dhe gratë në rrugët tona. Ne do t'i ndalojmë anijet dhe do t'i ndalojmë e deportojmë ata që hyjnë ilegalisht në vendin tonë, duke bërë atë që bën pothuajse çdo vend normal në të gjithë botën", u shpreh Farage gjatë një takimi me anëtarët e partisë Reform UK.
Deklarata e tij vjen në një moment të tensionuar në politikën britanike, pas dorëheqjes së zëvendëskryeministres Angela Rayner. Farage ka paralajmëruar mundësinë e zgjedhjeve të parakohshme, duke theksuar se plani i tij për emigracionin do të vihet në zbatim menjëherë pas një fitoreje zgjedhore.
“Nuk mund të vini ilegalisht dhe të qëndroni, ne do t’i ndalojmë anijet brenda dy javësh nga fitorja,” tha Farage.
Ai ka theksuar gjithashtu se një qeveri e drejtuar nga Reform UK do të marrë masa të menjëhershme për të ndaluar kalimet e paligjshme me anije dhe për të deportuar migrantët që hyjnë ilegalisht në vend.
Kujtojmë se përplasja mes Farage dhe kryeministrit shqiptar nisi pas deklaratave të politikanit britanik mbi numrin e lartë të shqiptarëve të burgosur në Mbretërinë e Bashkuar. Rama reagoi ashpër, duke i cilësuar komentet e Farage si “të pavërteta dhe fyese”.
