Dosja e “Arubas”, kaq e përfolur nga opozita javët e fundit, është shndërruar sot në mollën e sherrit mes saj dhe mazhorancës. Flamurin e mori i pari Gazment Bardhi, i cili në parlament përmendi emrin e Artur Shehut si njeriun kyç që, sipas tij, ka qenë në takim dhe ka përfituar si një prej krerëve të karteleve më të rrezikshme të drogës, duke marrë leje ndërtimi nga qeveria.
Bardhi deklaroi se pronat e Shehut përdoren nga kryeministri në takime elektorale, ndërsa shtoi se ky person ka qenë i pranishëm në takimin në Aruba.
Më i rezervuar në përmendjen e emrit të Artur Shehut ishte kryetari i PD-së, Sali Berisha. Në një prononcim për gazetarët, ai nuk e mohoi të ketë qenë në të njëjtën makinë me Shehun, duke thënë:
“Artur Shehu është një vlonjat i një familje siç më kanë thënë të persekutuar, por siç e morët vesh ju me Ëngjëll Agaçin i bënë 30 hektarë toka dhuratë general Lisin që e burgosën autoritetet italiane, vetëm e vetëm për të fshehur filmimet me sipërfaqet e drogës. Unë nuk mbaj mend a e kam takuar ndonjëherë në jetën time apo jo, por nuk e mohoj as e pohoj fare, se s’di asgjë. Të gjitha këto, Aruba është problemi se u mor një vendim për të dërguar përfaqësuesit në Aruba, thuhet se ka qenë Agaçi dhe një ministër,” – tha Berisha.
Edhe pse nuk ka dalë ende në skenë emri që lidh Sali Berishën dhe PD-në me Artur Shehun, është përfolur se deputeti demokrat i Vlorës, Bujar Leskaj, është ura e kësaj lidhjeje. Leskaj njihet botërisht për miqësinë e tij me Shehun dhe afërsinë e të dyve me PD-në.
Ndoshta për këtë arsye, Berisha duket i kujdesshëm në deklaratat e tij, duke mos mohuar por as pohuar takime me Shehun — diçka e çuditshme për një njeri me memorie brilante si kryetari i PD-së. Por meqë Bujar Leskaj është ende deputet i partisë, ndoshta ai mund t’ia rifreskojë kujtesën.
E njëjta gjë vlen edhe për ministrat që Berisha pretendon se kanë qenë në takim. I kujdesshëm për të mos përmendur emra, ndoshta ai nuk dëshiron të “djegë” ndonjë ish-ministër të Ramës me të cilin sot ka aleanca fluide.
Gjysmë të vërtetat, megjithatë, janë një mëkat i madh për një parti që prej vitesh ndodhet në opozitë. Nëse PD dëshiron të mbetet e besueshme në këtë betejë me regjimin, ajo duhet ta çojë deri në fund dosjen “Aruba”, duke përmendur çdo emër dhe treguar çdo të vërtetë, pa kompromis.
Sepse “Aruba” duket se po bëhet kryefjala e betejës politike të javëve të fundit.
