Ata që e shkarkuan në mënyrë të paligjshme me urdhër të Edi Ramës, sot e hëngrën turpin me bukë dhe i dërguan kërkesë Prokurorisë së Posaçme që t’ua nxjerrë Erion Velinë nga burgu, sepse e duan për mbledhjet e Këshillit Bashkiak. Të njëjtët që bashkuan votat me këshilltarët e PD-së për ta shkarkuar “Lali Erin” nga kryebashkiak, ata që i kthyen krahët dhe e braktisën duke i shtruar tapetin e kuq Ogertës ende pa dorëzuar mandatin e deputetes, po sot i kanë dërguar një letër vetë Erion Velisë se e kanë të pamundur të miratojnë buxhetin pa prezencën e tij.
A thua se vërtet Erion Veliaj ka qenë me laps e letër gjithë këto vite duke llogaritur buxhetet e duke u marrë me punët e Tiranës. Jo, jo. Të gjithë e dimë që ky është një pazar i radhës brenda familjes plaçkëprishëse socialiste.
Meqë vendimi i Gjykatës Kushtetuese ia prishi planet Edi Ramës për të zhvilluar zgjedhje në Tiranë, tashmë Tirana i duhet edhe për pak kohë me Erion Velinë nëpër këmbë. Pasi kryeministri i kërkoi Gjykatës Kushtetuese t’ia rikthejë në zyrë Erion Velinë dhe kjo kërkesë ra në vesh të shurdhër, sot ai ka vënë zarat e Këshillit Bashkiak t’ia kërkojnë SPAK-ut që Veliaj të jetë me kohë të plotë nën urdhrat e tij në Tiranë. Kjo edhe për të minimizuar krizat e njëpasnjëshme të qeverisë.
Vetëm se, tek-tuk nëpër bashki duhet të ketë ndonjë jurist t’ua shpjegojë këshilltarëve bashkiakë se vendimin për lirinë e kryebashkiakut e merr Gjykata e Posaçme. Dhe përpos të gjithave, Erion Veliaj mund ta ushtrojë funksionin edhe nga Durrësi, ku ndodhet prej disa muajsh.
Sa për këta këshilltarët bashkiakë që një herë e shkarkojnë në mënyrë të jashtëligjshme bashkë me PD-në e një herë tjetër e përkëdhelin me urdhër të Ramës — kjo është fotografia më e qartë e degradimit institucional në Tiranë: një këshill bashkiak që nuk funksionon sipas ligjit, por sipas pulsit të ditës të kryeministrit. Shkarkojnë, emërojnë, kërkojnë, tërheqin mbrapsht, si pjesë të një teatri ku qytetarët e Tiranës janë thjesht spektatorë pa të drejtë vote.
Në fund të fundit, mbetet e njëjta pyetje: a ka ndonjë institucion në këtë vend që funksionon sipas ligjit dhe jo sipas urdhrit? Sepse kjo lëvizje e sotme, nga ata që deri dje e konsideronin Veliajn “të përfunduar”, nuk ka asnjë lidhje me buxhetin, me interesin qytetar apo me administrimin e bashkisë.
Ka lidhje vetëm me interesat brenda një klubi të mbyllur politik, ku lojtarët ndryshojnë pozicionet sipas asaj që u thotë trajneri. Dhe Tirana, një qytet me gati një milion banorë, vazhdon të mbahet peng i pazareve që nuk kanë lidhje me të.
