Një nga mënyrat për të bërë karrierë politike në Shqipëri është të kalosh nga një parti te tjetra, duke u transformuar nga kritik i partisë në pushtet në bashkëpunëtor të saj. Një rast i tillë është Blendi Sulaj, i cili pas disa vitesh në opozitë, tani është një prej figurave në ngjitje në qeverinë socialiste, që tashmë do të mbajë postin e nënkryetarit të Bashkisë së Tiranës.
Sulaj u përfshi në politikë që kur Fatmir Mediu e emëroi nënkryetar të Partisë Republikane. Gjatë disa viteve, ai ishte një nga kritikët më të ashpër të qeverisë së Edi Ramës.
Në vitin 2021, pasi nuk arriti të kandidojë për deputet dhe pas humbjes së opozitës, dha dorëheqjen nga posti i nënkryetarit të Partisë Republikane. Pas kësaj, ai synoi të vazhdonte karrierën te Partia Demokratike, e cila në atë kohë drejtohej nga Lulzim Basha. Gjatë përçarjes së PD-së, Sulaj qëndroi në krahun e Bashës dhe brenda pak ditësh fitoi besimin e tij, duke u emëruar sekretar për Rininë në strukturën e re drejtuese të partisë.
Në këtë periudhë, Sulaj ishte aktiv në debatet televizive, duke kritikuar si Ramën ashtu edhe Berishën. Por edhe në PD-n e Bashës, nuk gjeti stabilitetin e dëshiruar, duke e parë të pasigurtë rrugën e tij politike aty. Në kërkim të një mundësie më të mirë, ai iu afrua Partisë Socialiste.
Në zgjedhjet e 11 majit, Sulaj ishte një nga emrat e rinj që u paraqit nga PS si kandidat për deputet. Edhe pse nuk arriti të siguronte një mandat, për shkak të listës së hapur, Rama nuk e la pas dore. Ai u emërua nënkryetar i Bashkisë së Tiranës, një pozicion ky shumë i rëndësishëm.
Në një vend si Shqipëria, ku shpesh mungon morali politik dhe parimet apo bindjet personale shiten për pak karrierë politike, kapërcimet e Sulajt janë për t’u pasur zili. Urojmë që ai të qëndrojë besnik në këtë post, ndonëse me Bashkinë e Tiranës nuk i ka pasur punët fort mirë.
Në vitin 2021, Sulaj u kallëzua nga Bashkia e Tiranës për kryerje punimesh pa leje në biznesin e tij. Sipas kallëzimit, më 1 nëntor 2021, në rrugën "Milto Tutulani" u kap duke kryer punime pa leje në ambientet e jashtme të lokalit “Dimos”, duke përdorur strukturë druri dhe tullash dekorative.
Shpresojmë që në detyrën e re Sulaj të respektojë ligjin dhe të mos përsërisë shkelje të tilla. Sa për kritikat që do marrë për kapërcimet nga njëra parti tek tjetra, mos ta vrasë mendjen se nuk është as i pari e as i fundit.
