Një tjetër denoncim i mbërritur në redaksinë e VNA ngre pikëpyetje serioze mbi aktivitetin e kompanisë ANK, në pronësi të Agim Kolës, për të cilën raportohen edhe lidhje familjare me biznesmenin Rrok Gjoka.
Sipas informacionit të mbërritur në redaksi, kompania në fjalë po nxjerr inerte në afërsi të urës së Milotit, në një zonë të ndjeshme të shtratit të lumit. Burimi i denoncimit pretendon se aktiviteti po zhvillohet prej ditësh, ndërkohë që institucionet përgjegjëse nuk kanë ndërmarrë asnjë reagim, pavarësisht sinjalizimeve.
Nxjerrja e inerteve nga lumenjtë është një praktikë që prej vitesh ka shkaktuar dëmtime të mëdha mjedisore, duke ndryshuar shtratin e lumenjve, duke rritur rrezikun e përmbytjeve dhe duke dëmtuar ekosistemin.
Rasti bëhet edhe më i ndjeshëm për shkak të historikut të kompanisë në projekte të rëndësishme infrastrukturore. ANK është një nga kompanitë që po ndërton një pjesë të aksit Librazhd-Prrenjas, segment që pak kohë më parë u bë objekt debati publik pasi shembja e një pjese të rrugës bllokoi për një kohë të gjatë gjithë juglindjen e vendit.
Kjo ngjarje ngriti pyetje mbi cilësinë e punimeve dhe mbi mënyrën se si monitorohen projektet infrastrukturore me kosto të lartë për buxhetin publik.
Denoncimi për nxjerrjen e inerteve pranë urës së Milotit shton edhe më shumë shqetësimet për mënyrën se si operojnë disa kompani të mëdha ndërtimi në vend, ndërkohë që kontrollet institucionale duket se mungojnë ose mbeten vetëm në letër.
Deri tani nuk ka asnjë reagim nga institucionet përgjegjëse për mjedisin apo nga autoritetet lokale, ndërsa mbetet e paqartë nëse aktiviteti i raportuar kryhet me leje apo në kundërshtim me ligjin.
Nëse pretendimet e denoncimit rezultojnë të vërteta, rasti do të ngrinte një tjetër pikëpyetje të madhe:
a po shfrytëzohen lumenjtë shqiptarë si burim i pakontrolluar inerteshe, ndërsa institucionet zgjedhin të mos shohin?
