Edi Rama ka gjetur variantin e Elisa Spiropalit për të relativizuar shembjen e rrugës që lidh Korçën me Tiranën dhe që ka paralizuar juglindjen e Shqipërisë. Në një postim në X ai ka publikuar një video ku shihet një rrugë fshati në Portugali e shkatërruar nga moti i keq dhe, bashkë me të, ka sulmuar opozitën dhe median që prej tre ditësh kanë ngritur alarmin për shembjen e rrugës nacionale Korçë–Tiranë.
“Çudi e madhe, në Portugali ka ndodhur kjo nga të njëjtat fenomene, po s’po e marr vesh se mirë opozita portugeze është në gjumë, mirë edhe ato pak tenxhere mediatike të Portugalisë janë me temperaturë të ulët e s’ka vend për gjithë këtë rrugë të re, po si ka mundësi që opozitat e këtushme nuk e kanë denoncuar akoma në SPAK këtë vepër të korrupsionit dhe si është e mundur që 700 tenxheret e flakta të mexhelisit tonë mediatik, nuk kanë thirrur gjithollogët e tyre që të jashtënxjerrin faktet e tmerrshme që fshihen nën asfaltin e këtij korrupsioni qeveritar, ku padyshim është dora e narkoshtetit shqiptar!”
Në fakt, pyetja e parë që lind pas kësaj është: a ka sy (apo syze) kryeministri që të shohë se bëhet fjalë për një rrugë krejtësisht lokale në postimin e tij? A ka pyetur Edi Rama se për sa kohë është ndrequr ajo rrugë dhe a ka mbajtur dikush përgjegjësi?
Përndryshe, këto relativizime i shkojnë më shumë Elisa Spiropalit me formulën “ngjarje të tilla ndodhin kudo në botë”. Vetëm se në botën e qytetëruar me këto ngjarje nuk bëhen vetëm filma — mbahet edhe përgjegjësi nga ata që kanë për detyrë të ndërtojnë rrugë me standard.
