Fatmir Mediu, kreu i Partisë Republikane, ka gjetur momentin e duhur për të dhënë mend edhe mbi rendin botëror. Në një intervistë për Syri Tv, ai u shfaq i bindur se Donald Trump e ka rikthyer Amerikën si “autoritetin kryesor gjeopolitik”, ndërsa nuk nguroi të paralajmërojë për rreziqet e Ballkanit nëse kufijtë e Ukrainës ndryshojnë.
Mediu i përshëndeti me entuziazëm takimet e Trump në Alaska e Washington, duke i parë si shenjë të një paqeje të afërt mes Ukrainës dhe Rusisë. Por si njohës i gjeostragjive botërore ai nuk la pa dhënë edhe një këshillë për Europën: të gjejë gjuhën e përbashkët në politikën e jashtme, pasi – sipas tij – Brukseli, Roma e Parisi flasin secili më vete.
Dhe kështu, ish-ministri i Mbrojtjes që mbahet mend për Gërdecin dhe që sot është nën hetim nga SPAK, ka marrë rolin e strategut global. Me gjasë pakkush kujtohet për suksesin e tij si Ministër i Mbrojtjes ndërsa për fat të mirë Trump dhe Europa nuk e kanë në plan të dëgjojnë këshillat e Mediut. Zot na ruaj botën nga ndonjë Gërdec me përpasa botërore.
