Shkodra është tronditur dje nga një ngjarje e rëndë, një vrasje në mes të ditës në mes të qytetit motivet e së cilës fshehin të vërtetën e frikshme; atë të marrjes së kontrollit nga bandat.
Kjo nuk është hera e parë që Shkodra përjeton tronditje të tilla që në thelb shënon një rrënim të sigurisë së qytetarëve por dhe të vlerave të qytetarisë që mbart kryeqendra e veriut. Vrasje, banda që qarkullojnë lirshëm dhe frika mes qytetarëve të thjeshtë është tashmë panorama e vërtetë e këtij qyteti që nuk e retushojnë dot as postimet bajate të kryetarit të bashkisë dhe as përpjekjet për ta bërë realitetin të duket ndryshe nga sa është.
Një polici thuajse inekzistente, një drejtësi me probleme të mëdha profesionale dhe morale teksa lë të lirë njerëz të rrezikshëm, një pushtet lokal që ka veç furçën në dorë për të lyer me ngjyra atë që sterron në realitetin shkodran. Por mbi të gjitha politika: ajo që duhet të marrë në dorë situatën dhe të vendosë për sigurinë e qytetit dhe qytetarëve të saj. Për herë të parë në Shkodër PS është në avantazh dhe mesa duket kjo është shenja e parë se punët po shkojnë dhe më keq. Jo se PD shkëlqeu në vitet kur kishte mazhorancën në Shkodër, por së paku situata nuk ishte kjo që është sot. Ky nuk është justifikim për mënyrën banale dhe shfrytëzuese që PD ka zgjedhur për të vjelë të mirat e Shkodrës dhe për ta lënë atë të zvarritet në mjerimin e përditshëm. Por është tregues se politika tashmë është dorëzuar para kriminalitetit në Shkodër.
Ndaj kur Rama zgjedh “neomalësore” dhe të ngjashme të saj për të përfaqësuar Shkodrën në parlament gënjeshtra shndërrohet në mashtrim politik. Në fakt Marjana Koçeku nuk ka asnjë faj pse ndodhin krime në Shkodër. Madje me gjasë as nuk ka kuptuar ende se ç’ka ndodhur dhe çfarë fshihet pas krimit të radhës. Por fytyra e saj është përdorur për të paketuar bukur votat për ata që sot mbajnë përgjegjësi reale për kriminalitetin e qytetit. Në çdo vend normal të Europës ngjarja e djeshme do ishte një këmbanë alarmi, një motiv i fortë që përfaqësuesit politikë të saj të pushtetit vendor dhe qendror të bëheshin bashkë për një motiv të përbashkët: luftën ndaj krimit të organizuar. Por për sa kohë tentakulat e këtij krimi janë shtrirë gjerë e gjatë në politikën lokale dhe qendrore që qeveris Shkodrën dhe gjithë Shqipërinë, vështirë se mund të lexosh qoftë dhe një rresht, një ndjesë apo reflektim për realitetin e dhimbshëm.
Shqipëria dhe bashkë me të Shkodra janë pjesë të një vorbulle krimi dhe korrupsioni që mban peng sigurinë e qytetarëve dhe zhvillimin. Ndaj së paku na i kurseni paketimet me të rinj që përdoren si fasadë për të treguar një realitet që nuk ekziston dhe për të kërkuar vota për një shpresë që ka vdekur pa lindur. Na mjafton Edi Rama për këtë!
