Duke filluar nga data 12 tetor 2025, Bashkimi Evropian do të fillojë zbatimin gradual të një sistemi të ri për menaxhimin e kufijve të jashtëm – Sistemi i Hyrjes/Daljes (Entry/Exit System – EES). Ky sistem do të zbatohet për qytetarët që nuk janë pjesë e BE-së, përfshirë shqiptarët që udhëtojnë për qëndrime afatshkurtra në 29 vendet e Zonës Shengen.
Sipas njoftimit të Delegacionit të BE në Tiranë, sistemi do të regjistrojë automatikisht të dhënat e udhëtimit, përfshirë:
informacionin nga dokumenti i udhëtimit,
datat e mbërritjes dhe largimit,
dhe të dhënat biometrike si gjurmët e gishtave dhe imazhi i fytyrës.
Pa tarifa shtesë dhe pa procedura paraprake
BE bën të ditur se qytetarët nuk kanë nevojë të kryejnë ndonjë veprim përpara udhëtimit dhe se ky proces nuk ka asnjë tarifë shtesë.
Zbatimi i EES do të bëhet në mënyrë graduale gjatë një periudhe 6-mujore në të gjitha pikat kufitare të jashtme të vendeve që përdorin sistemin. Kjo nënkupton se në fazat e para, jo çdo pikë kufitare do të mbledhë menjëherë të gjitha të dhënat biometrike, dhe pasaportat do të vazhdojnë të vulosen si më parë.
Zbatimi i plotë nga 10 prilli 2026
Nga 10 prilli 2026, sistemi pritet të jetë tërësisht funksional në të gjitha kufijtë e jashtëm të vendeve evropiane pjesë e EES.
Sistemi do të përfshijë udhëtarët jo-BE që:
posedojnë vizë qëndrimi të shkurtër; ose
janë të përjashtuar nga viza, por udhëtojnë për qëndrime deri në 90 ditë brenda një periudhe 180-ditore.
Qëllimi i sistemit është të lehtësojë kalimin në kufi dhe të sigurojë që udhëtarët të respektojnë afatet e lejuara të qëndrimit. Në rastet kur tejkalohet periudha e lejuar apo kur refuzohet hyrja, këto informacione do të regjistrohen gjithashtu në sistem.
