Deputetët e PS, Ogerta Manastirliu dhe Agron Malaj, duket se kanë marrë përsipër të drejtojnë edhe punët e bashkive Tiranë dhe Mat.
Në mungesë të kryebashkiakut të Tiranës, Erion Veliaj, i cili ndodhet në burg, kandidatja e shpallur për kryebashkiake në zgjedhjet që nuk u mbajtën, Ogerta Manastirliu, duket se ka marrë rolin e kryebashkiakes ende pa u votuar. Kjo vihet re në takimet që ajo organizon prej disa javësh në zona të ndryshme të kryeqytetit, ku udhëheq diskutimet për buxhetin e Bashkisë së Tiranës për vitin 2026, ndërsa përfaqësuesit zyrtarë të Bashkisë shfaqen vetëm si sfond gjatë aktivitetit.
Por nëse Manastirliu mbetet një kryebashkiake “në tentativë”, një tjetër deputet i PS-së, Agron Malaj, duket se ende nuk e ka lënë pas rolin e kryetarit të Bashkisë së Matit. Malaj la detyrën për t’u zgjedhur deputet në zgjedhjet e 11 majit, por dorëheqja e tij duket të ketë qenë thjesht procedurale, sepse praktikisht ai nuk është tërhequr nga drejtimi i bashkisë. Edhe pse Mati ka një kryetar të ri të zgjedhur në 9 nëntor Altin Bojni, Malaj shihet rregullisht në postimet e tij duke takuar qytetarët në dëgjesa publike për buxhetin, ndërsa kryebashkiaku i ri shfaqet thuajse si një nëpunës i zakonshëm.
Kjo sjellje e deputetëve të PS-së ka ngritur shqetësime për politizimin e buxhetit lokal dhe për “uzurpimin” e drejtimit të bashkive nga partia në pushtet, në kundërshtim me Kushtetutën, legjislacionin vendor dhe Kartën Europiane të Vetëqeverisjes Vendore.
Agron Malaj është një emër i lakuar së fundmi edhe në dosjen e 21 janarit: ai ka qenë pjesë e grupit të zjarrit që dyshohet se ka qëlluar drejt protestuesve.
