Jorida Tabaku dhe Redi Muçi kanë shkëmbyer sot replika në Parlament lidhur me statusin e minatorit dhe protestën e pensionistëve të organizuar nga Lëvizja Bashkë.
Deputeti i partisë së Arlind Qorit kritikoi PD-në për apatinë e saj dhe vonesën e reagimit për statusin e minatorit, përfshirë edhe mosreagimin e deputetëve të opozitës për protestën e sotme të pensionistëve para Parlamentit. E prekur, zonja Tabaku i kërkoi deputetit Redi Muçi të mos bëjë “opozitën e opozitës”, sepse kështu — sipas saj — “bën lojën e Ramës”.
Tabaku u shpreh se PD e ka propozuar tre vite më parë statusin e minatorit dhe se Lëvizja Bashkë “është shumë më mbrapa PD-së për hallet e popullit”.
Deri këtu gjithçka duket si një debat normal në Parlament, përveç tezës: mos bëni opozitën e opozitës. Çka do të thotë se të gjithë duhet të jenë në sinkron me opozitën e PD-së së Sali Berishës. Përndryshe, quhen në funksion të Ramës.
