Sali Berisha ka nisur punën për tubime edhe jashtë vendit, duke qenë se ato në Tiranë ende nuk po e lëkundin qeverinë e Edi Ramës. Në një postim në Facebook, Berisha shprehet se sot është takuar me përfaqësues të diasporës, ku u ka folur për qeverisjen aktuale, të cilën e quan regjim diktatorial që ka tejkaluar në dëm kombëtar.
Kreu i PD shprehet se u foli të pranishmëve për emigrimet masive të shqiptarëve, rënien e popullsisë, mbrojtjen e të korruptuarve dhe numrin e lartë të punonjësve të administratës, që sipas tij, regjimi ua pengon fëmijëve të tyre të protestojnë.
Meqë brenda vendit ende nuk po i bën bashkë shqiptarët kundër qeverisë, kryedemokrati u bëri thirrje atyre që janë jashtë kufijve të bëhen bashkë dhe të mos e shohin këtë si betejë partiake, por si betejë për ekzistencën e Shqipërisë.
Berisha ka kërkuar që të ketë një mobilizim pranë ambasadave të Shqipërisë dhe institucioneve ndërkombëtare, ndërsa shprehet se beteja është plotësisht e fitueshme.
Ndonëse kanë kaluar 5 vite nga rikthimi i tij de jure në krye të PD, gjatë të cilave betejën e ka quajtur të lehtë dhe të fitueshme, kjo është realizuar vetëm në retorikën e Berishës. Sot shqiptarët gëzojnë qeverinë e Edi Ramës në supermandatin e tij të katërt, me shpresën e shuar për ndonjë ndryshim nga opozita dhe me emigrimin ende si zgjidhje për të ardhmen.
Megjithatë, të shpresojmë që akti i radhës që do të bëjë do ta trondisë vërtet qeverinë e Edi Ramës dhe të mos përfundojë vetëm me zëvendësimin e Elisa Spiropalit, e cila ka nisur reforma të thella në diplomacinë shqiptare pas kritikave që mori nga shefi i saj.
