Mijëra qytetarë iu bashkuan sot thirrjes së PD për një protestë kombëtare, e cila nisi para Kryeministrisë me një koreografi të zbehtë dhe fjalime mediokre, për t’u ndezur me fjalimin e kryetarit Sali Berisha. “Jemi në kilometrin e fundit të fitores”, tha ai. “Në këtë udhëtim ne u ngritëm si Feniksi nga hiri dhe nga izolimi më i thellë arritëm në kilometrin e fundit si forca politike më e mbështetur nga shqiptarët dhe partitë simotra në mbarë botën. Arritëm në kilometrin e fundit pasi plagosëm për vdekje bishën narkodiktaturë dhe u dëshmuam shpresa e vetme e shqiptarëve”, u shpreh Berisha.
Pa u larguar ende nga podiumi, molotovë dhe fishekzjarre u hodhën drejt Kryeministrisë, duke shënuar përplasje mes protestuesve dhe policisë. Skenari i ngjashëm me protestat e opozitës të vitit 2019 vijoi me gaz lotsjellës dhe zhvendosjen e protestës para Kuvendit të Shqipërisë. Edhe aty, pas përplasjeve me policinë me gaz lotsjellës dhe ujë, disa protestues dhe efektivë u lënduan, ndërsa deputetë të PD ngritën zërin dhe demonstruan forcë ndaj forcave të rendit.
Ashtu si protestat e organizuara nga ish-kryetari Lulzim Basha në 2019, edhe kjo e sotmja përfundoi në selinë e PD, me ndryshimin e vetëm se Sali Berisha nuk këndoi himnin, por si paraardhësi i tij premtoi se beteja do të vazhdojë me një protestë tjetër, deri në rrëzimin e Edi Ramës dhe asaj që e cilëson si narkoregjim.
