Partitë politike kanë arritur marrëveshjen për variantin përfundimtar të ngritjes dhe funksionimit të Komisionit të Reformës Zgjedhore.
Komisioni i Posaçëm do të përbëhet nga 16 anëtarë: 7 nga Grupi Parlamentar i Partisë Socialiste, 7 nga Grupi Parlamentar i Partisë Demokratike dhe 2 përfaqësues nga partitë që kanë fituar të paktën dy mandate në zgjedhjet parlamentare të 11 majit 2025. Emrat e anëtarëve do të përcaktohen me vendim të Kuvendit.
Në mbledhjet e Komisionit do të mund të marrin pjesë edhe deputetë të tjerë të partive parlamentare, pa të drejtë vote, por me mundësi për të paraqitur propozime për ndryshime në legjislacionin zgjedhor. Vendimmarrja në Komision do të bazohet në parimin e konsensusit të gjerë.
Vendimet konsiderohen të miratuara me shumicën e votave të të gjithë anëtarëve, por vetëm nëse sigurohet edhe dakordësia e të dy bashkëkryetarëve.
Komisioni do të ushtrojë veprimtarinë e tij për një periudhë 9-mujore nga momenti i miratimit të këtij vendimi. Në rast nevoje, me kërkesë të arsyetuar të bashkëkryetarëve, Kuvendi mund të vendosë zgjatjen e afatit me një vendim të veçantë.
