Ministrja e re e Shëndetësisë, Evis Sala, sapo ka marrë detyrën dhe duket sikur ka zbuluar një Shqipëri tjetër. “Megjithëse nuk e njihja dhe mund të kisha humbur, ndryshimet janë të dukshme. Është më mirë nga ana strukturore se sa në spitalet ku kam punuar. Kur sheh sa mirë është ana e strukturës së spitaleve…”, tha ajo, duke dhënë përshtypjen se sistemi ynë shëndetësor qenka pothuajse model – të paktën në letër e fasada.
Në prezantimin e saj ishte i pranishëm edhe kryeministri Edi Rama, i cili premtoi një partneritet me një nga kompanitë më të njohura në fushën e inteligjencës artificiale për shërbimin shëndetësor.
Por, teksa kryeministri flet për teknologji dhe AI, spitalet shqiptare përballen me mungesa elementare: dezinfektim dhe medikamente. Sado të përpiqet Rama të “mbulojë diellin me shoshë” dhe ministrja e re të shfaqet optimiste, gjendja e shëndetësisë në vend mbetet katastrofike. Për ta kuptuar këtë, mjafton një vizitë e vetme në spitalet publike.
