Ministri i Ekonomisë në Maqedoninë e Veriut nga radhët e partisë Lëvizja BESA, Besar Durmishi, ka reaguar pas deklaratave të ministrit të Jashtëm të Shqipërisë, Ferit Hoxha, lidhur me shqiptarët në Maqedoninë e Veriut.
Në një reagim publik në rrjetet sociale, Durmishi e cilëson si “zhgënjyes dhe të papranueshëm” fjalorin e përdorur nga Hoxha, duke theksuar se deklarata të tilla janë të papërshtatshme për një përfaqësues shtetëror. Ai kërkon reagim dhe sqarim urgjent nga autoritetet në Tirana, ndërsa i bën thirrje kryediplomatit shqiptar të kërkojë falje publike ndaj shqiptarëve në Maqedoninë e Veriut.
“Zhgënjyes dhe i papranueshëm fjalori i Ministrit të Jashtëm të Shqipërisë, i cili i quan shqiptarët e Maqedonisë së Veriut ‘idiotë’. Presim reagim dhe sqarim urgjent nga Tirana zyrtare”, shprehet Durmishi, duke shtuar se një gjuhë e tillë “shkel çdo kod etik dhe profesional”.
Më tej, ai i kujton Hoxhës detyrimin kushtetues për t’u kujdesur për bashkëkombasit jashtë kufijve të Shqipërisë, duke theksuar se shqiptarët në Maqedonia e Veriut janë “pjesë e pandashme e trungut kombëtar” dhe jo thjesht fqinj.
Në reagimin e tij, Durmishi shpreh gjithashtu zhgënjim për mungesën e një qëndrimi nga ambasadori shqiptar në Shkup, Denion Meidani, duke e kritikuar për mosreagim ndaj deklaratave të ministrit të Jashtëm.
