Inspektori i Lartë i Drejtësisë (ILD) ka vendosur të mos nisë hetimet ndaj prokurores Elsa Gjeli, pavarësisht kritikave të kryeministrit Edi Rama për mosveprimin në rastin e ndërtimit pa leje në Theth.
Në vendimin e tij, ILD njofton arkivimin e ankesës së Ministrit të Drejtësisë, Ulsi Manja, e regjistruar me numër 2138 prot., datë 10 korrik 2025, kundër veprimtarisë së prokurores Elsa Gjeli, e cila operon në Prokurorinë pranë Gjykatës së Shkallës së Parë të Juridiksionit të Përgjithshëm Shkodër.
Inspektori ka arritur në përfundimin se nuk ekzistojnë elementë të mjaftueshëm juridikë apo faktikë që të justifikojnë nisjen e një hetimi disiplinor ndaj magjistrates Gjeli.
Vendimi i Inspektorit të Lartë të Drejtësisë:
Lënda:
Njoftim mbi vendimin e arkivimit të ankesës pas verifikimit
MINISTRIT TË DREJTËSISË
ULSI MANJA Bulevardi “Zog I-rë”
Tiranë
Për dijeni:
Znj. Elsa Gjeli
Prokuroria pranë Gjykatës së Shkallës së Parë të Juridiksionit të Përgjithshëm Shkodër
Ju vëmë në dijeni se, Inspektori i Lartë i Drejtësisë (ILD) pas shqyrtimit fillestar të ankesës tuaj, të regjistruar me nr. 2138 prot., datë 10.07.2025, ndaj veprimtarisë së magjistrates znj. Elsa Gjeli, prokurore e Prokurorisë pranë Gjykatës së Shkallës së Parë të Juridiksionit të Përgjithshëm Shkodër, si dhe referuar vendimit nr. 2138/3 prot., datë 15.07.2025 të Inspektorit të Lartë të Drejtësisë “Për verifikimin pas shqyrtimit fillestar të ankesës” dhe informacionit të marrë, ka konkluduar se, nuk konstatohen paraprakisht elementë juridikë apo faktikë të cilët i krijojnë Inspektorit të Lartë të Drejtësisë një dyshim të arsyeshëm për fillimin e hetimit disiplinor ndaj magjistrates znj. Elsa Gjeli me detyrë prokurore në Prokurorisë pranë Gjykatës së Shkallës së Parë të Juridiksionit të Përgjithshëm Shkodër. Për këtë arsye, është vendosur arkivimi pas verifikimit të ankesës tuaj, bazuar në nenin 122, pika 4 të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, të ndryshuar.
Në mbështetje të nenit 119, pika 4 dhe nenit 122, pika 5 të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, të ndryshuar, bashkëlidhur këtij njoftimi, ju lutemi, të gjeni një kopje të vendimit të arkivimit të ankesës.
Në përputhje me nenin 122, pika 5 të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, të ndryshuar, ju keni të drejtë të ankimoni këtë vendim në Këshillin e Lartë të Prokurorisë, brenda 1 (një) jave nga data e marrjes së vendimit të arsyetuar.
INSPEKTORI I LARTË DREJTËSISE SHQIPE ARTE ID
Artur Metani
