Jo vetëm diplomatët, por edhe deputetët e opozitës munguan në seancën e parë të gjykimit në themel ndaj Ilir Metës. Kjo u pa qartë sot në GJKKO, ku kishin mbërritur vetëm disa mbështetës të ish-presidentit, deputetët e LSI-së dhe Bujar Leskaj, deputet i PD-së dhe një mik i hershëm i Metës.
Asnjë deputet tjetër i Partisë Demokratike nuk ishte i pranishëm në gjykatë, edhe pse kjo ishte dalja e parë publike e ish-presidentit pas thuajse dy vitesh në paraburgim.
Në seancën e sotme nuk morën pjesë as përfaqësues të ambasadave të huaja në Tiranë, megjithëse sipas burimeve Meta i kishte ftuar zyrtarisht për të qenë të pranishëm.
