Kryetari i Partisë Republikane, Fatmir Mediu, ka minimizuar rëndësinë e shpalljes “non grata” të ish-kryeministrit Sali Berisha nga Departamenti Amerikan i Shtetit, duke e quajtur një vendim politik dhe jo juridik.
Në një intervistë për Euronews Albania, në emisionin “Review”, Mediu tha se Berisha është i lirë të aplikojë për vizë për të vizituar Shtetet e Bashkuara të Amerikës, duke nënvizuar se “non grata është një histori kot”.
“Chris LaCivita ka qenë menaxher fushate, me kontratë menaxhimi dhe i ndaluar nga ligji që të bëjë lobim. Ai ka theksuar se është në marrëdhënie të vazhdueshme me administratën amerikane për çfarë ndodh në Shqipëri dhe nuk do ta sakrifikonte këtë marrëdhënie për të ndihmuar Berishën. Departamenti Amerikan i Shtetit, tre ditë para zgjedhjeve, theksoi se vendimmarrja për statusin ‘non grata’ është politike, me të cilën ne nuk pajtohemi. Berisha është i lirë të aplikojë për vizë për të ardhur në SHBA”, deklaroi Mediu.
Sipas tij, fakti që Berisha nuk ka aplikuar deri tani për vizë lidhet vetëm me vullnetin personal, pasi procedura është e hapur.
