Kryetari i Partisë Demokratike, Sali Berisha, u shfaq këtë të hënë në foltoren para Kryeministrisë së bashku me një numër të kufizuar mbështetësish, në vijim të asaj që opozita e quan “qëndresë qytetare”.
Në fjalën e tij, Berisha u ndal te roli i parlamentit, duke e cilësuar atë “zero”, ndërsa akuzoi kryeministrin Edi Rama se refuzon çdo pyetje dhe interpelancë nga opozita dhe se nuk lejon ngritjen e komisioneve hetimore parlamentare.
Sipas tij, prej muajsh parlamenti nuk ushtron funksionin e kontrollit ndaj qeverisë dhe opozita nuk ka mundësi të paraqesë amendamente apo iniciativa ligjore. Berisha e quajti situatën një krizë të thellë politike dhe ftoi qytetarët të reflektojnë për gjendjen e vendit.
Ndërkohë, duke kujtuar protestën e një dite më parë, ai e përshkroi atë si një “kryengritje paqësore”, duke theksuar se opozita do të vazhdojë protestat kundër asaj që e quan “diktaturë të drogës, krimit dhe vjedhjes”.
Edhe pse retorika ishte e fortë dhe e mbushur me premtime për përmbysje, pamja para Kryeministrisë mbeti më modeste, me një tubim që më shumë ngjante me një takim të rregullt të së hënës sesa me paralajmërimin për një stuhi politike.
