Mbledhja e mbremshme e Kryesisë së Partisë demokratike, rikonfirmoi dhe njehere se ujërat në këtë parti nuk janë të qeta. Debatet pa media me akuza dhe kundër akuza u përqendruan te çështja e Avokatit të Popullit. Vëmendja ishte tek debati i Sali Berishës dhe Ervin Salianjit, i cili i ka prishur qetësinë me takimet që po zhvillon me demokratët.
Në paralajmërimet e mëhershme të Berishës se do të merren masa ndaj demokratëve që nuk bënë fushatë në zgjedhjet e 11 majit, duket se bën pjesë edhe Hysen Kadiu, me i votuari i primareve te tiranes dhe që sot është në mbështetje të lëvizjes së Salianjit.
Sipas Berishës, largimi i tij gjatë kohës së fushatës ishte hakmarrje pasi nuk u fut në listën e sigurt për deputet. Kjo deklaratë u kundërshtua nga Salianji, i cili tha se Kadiu ka qenë aktiv në fushatë në mbështetje të PD-së.
Sali Berisha: Hysen Kadiu ka ikur në fushatë në Amerikë. Ia kam premtuar që do jetë në listë të sigurt, por s’e mbajta dot, por ai iku, ma ka thënë.
Salianji: Ka qenë në fushatë dhe ka foto të tij nëpër zona dhe duke bërë thirrje për fushatë për të votuar PD.
Berisha: Po gënjen, ai s’ka punuar.
Salianji: Edhe falë tij jemi 2800 vota para. Fjalën “gënjen” tërhiqe.
Berisha: Jo, nuk ka qenë.
Salianji: Të respektoj si kryetar partie, por fjalën “gënjen” tërhiqeni ose dal nga mbledhja.
Berisha: Ai më ka dërguar SMS vetë.
Salianji: Mendova që sot duhet të flisnim vetëm për skandalin Rama–Balluku. Sot, me këtë, po zhvendosni vëmendjen. Problemi qenka shqetësimi që kanë demokratët dhe jo vjedhjet e qeverisë. Unë erdha t’i bëjmë gjyqin qeverisë, por nëse doni për demokratët, ja e bëjmë. Do më keni me cel në dorë për të denoncuar këdo që bashkëpunon me qeverinë.
Ndërsa përplasja më e ashprër ishte mes Ervin Salianjit dhe Flamur Nokës. Sekretari i përgjithshëm i PD akuzoi ish-deputetin demokrat se ka angazhuar grupin e Suel Çelës që mos të lejojë qytetarët të marrin pjesë në Foltoren e Berishës.
“Në Elbasan njerëzit thonë që po angazhohet Suel Çela për të mos pasur njerëz në tek foltorja dhe ky është ndikimi yt“, iu drejtua Salianjit.
Salianji nga ana e tij iu përgjigj duke thënë se deklaratat janë idiotësi dhe se para katër vitesh Noka ishte akuzuar që mblidhte firmat e seksioneve nën kërcënimin e Suelit.
“Ende nuk e kam caktuar takimin, por meqë deri sot kam menduar që s’dua përçarje dhe as dua të flas, po të them që ti duhet të jesh i kujdesshëm, sepse ke qenë i akuzuar para 4 vitesh se mblidhje firmat e seksioneve nën kërcënimin e Suelit. Pastaj, se kush e takon, ju e dini që jua sjell me fakte nëse vazhdoni me këto idiotësi”, u shpreh ish-deputeti i PD.
Një pikë tjetër që solli përplasje ishte edhe zgjedhja e Avokatit të Popullit. Sali Berisha kërkoi që deputetët që kanë firmosur të kërkojnë falje publike, ndërsa Noka dhe Salianji u përplasën për përgjegjësitë në strukturat e partisë.
Ish-deputeti i PD i kërkoi dorëheqje Nokës duke e akuzuar se po shkatërron strukturat e partisë.
“Avokati i Popullit ishte gabim strategjik. PD duhet të shkonte me një kandidat. E kemi dërguar para 4 vitesh Ledio Brahon kandidat të vetëm dhe e ka rrëzuar Rama. Nuk mund t’u thuash deputetëve që firmosni kë të doni dhe pastaj thua pse na e hodhi Rama. Duket si pazar te njerëzit dhe ti, Flamur, meqë po i del për zot, duhet të japësh dorëheqjen për shkatërrimin e strukturës, organizimit dhe perceptimin që jeni shitur te Rama”, tha Salianji.
Në fund të mbledhjes, dukej se interesin mediatik e kishte fituar Salianji i cili theu edhe traditën e Berishës që pas çdo mbledhje fliste për gazetarët. Mbrëmë mediat u mblodhën për të pyetur Salianjin se çfarë kishte ndodhur në takimin e Kryesisë, duke mos ia dhënë mundësinë kreut të PD të thotë fjalën e fundit.
