Një reagim tjetër ndërkombëtar ka ardhur këtë të enjte nga Komisioni Evropian në Shqipëri lidhur me votimin e kësaj të enjteje për rrëzimin e kërkesës së SPAK për imunitetin e Belinda Balluku.
Në reagimin e tij, Komisioni Evropian vendos theksin te rëndësia që ka lufta kundër korrupsionit për procesin e integrimit të Shqipërisë në Bashkimi Evropian.
Por ajo që bie më shumë në sy në këtë reagim është formulimi i përdorur nga Brukseli: “Bashkimi Evropian merr shënim rezultatet e votimit të sotëm në Parlamentin e Shqipërisë.”
Në gjuhën diplomatike europiane, shprehja “merr shënim” është një formulë e ftohtë dhe e kujdesshme, që përdoret shpesh kur institucionet europiane nuk duan të hyjnë në polemikë të drejtpërdrejtë, por njëkohësisht duan të tregojnë se një zhvillim i caktuar është regjistruar dhe do të merret parasysh në vlerësimet e ardhshme.
Pas këtij formulimi, Komisioni Evropian thekson qartë dy elementë kyç të procesit të integrimit.
“Angazhimi ndaj shtetit të së drejtës dhe lufta kundër korrupsionit janë me rëndësi thelbësore për procesin e anëtarësimit në BE.
Sigurimi i një mjedisi të përshtatshëm që SPAK të kryejë në mënyrë efektive punën e tij është thelbësor për të mbështetur në mënyrë të besueshme përparimin e Shqipërisë drejt anëtarësimit në BE”, thuhet në reagimin e Komisionit Evropian.
Mesazhi i Brukselit, edhe pse i formuluar me gjuhë diplomatike, vendos në qendër një kërkesë të qartë: funksionimi i pakushtëzuar i drejtësisë dhe i SPAK mbetet një element vendimtar për rrugën europiane të Shqipërisë.
