Mazhoranca socialiste refuzoi mbrëmë vonë kërkesën e opozitës për ngritjen e dy komisioneve hetimore parlamentare, një për çështjen “McGonigal” dhe tjetrin për zgjedhjet vendore të 11 majit. Socialistët argumentuan se kërkesa e demokratëve ishte e paplotë.
Kreu i grupit parlamentar të PS-së, Taulant Balla, deklaroi se Partia Demokratike duhet të bëhet pjesë e Komisionit të Reformës Zgjedhore, duke theksuar se zgjedhjet e 11 majit janë certifikuar nga institucionet ndërkombëtare dhe nuk ka vend për hetim të mëtejshëm.
Nga ana tjetër, lideri i PD-së Sali Berisha reagoi ashpër, duke e cilësuar vendimin e mazhorancës “një nga aktet më të rënda në historinë parlamentare”. Ai akuzoi PS-në se po mohon të drejtën kushtetuese të opozitës për hetim dhe se zgjedhjet e 11 majit u “damkosën si farsë elektorale” në raportin e OSBE/ODIHR.
“Do bëjmë çdo betejë për rikthimin e votës së lirë. Me këtë vendim ju vetëm sa firmosni fundin e këtij parlamenti. Ne nuk kemi njohur zgjedhjet dhe rezultatin e tyre”, tha Berisha, duke shtuar se opozita disponon “mijëra fakte” për parregullsi dhe se nuk do të lejojë bllokimin e së drejtës për hetim.
Pas dështimit të kërkesës në Kuvend, PD ka thirrur mbledhje të jashtëzakonshme të grupit parlamentar ditën e premte, më 31 tetor, në orën 12:00, për të vendosur hapat e mëtejshëm.
“Nesër, ora 12:00, mbledhje e posaçme lidhur me mohimin e të drejtave kushtetuese të opozitës. Të mos ketë mungesa”, thuhet në njoftimin zyrtar dërguar deputetëve demokratë.
Opozita paralajmëron një fazë të re përballjeje, ndërsa mazhoranca mbetet e vendosur të mos miratojë komisionet hetimore të kërkuara.
