“Kur shkoni te njerëzit për të nxjerrë foto në FB, mos shkoni me veshje 5000-6000 euro se është gjynah”, tha mes të tjerash Manja.
Deputeti i Partisë Socialiste, Ulsi Manja, kritikoi homologët e PD-së, duke u kërkuar atyre që kur të shkojnë në takime me qytetarët, të mos shkojnë me veshje luksoze. Komentet Manja i bëri nga foltorja e Kuvendit, ku tha se projekt-buxheti për vitin 2026 është i pakrahasueshëm me buxhetet e Partisë Demokratike në kohët që kjo forcë politike ka qenë në pushtet.
Ne fakt Manja harroi të kthejë pak kokën e të shohë veshjen e ministres së Jashtme Elisa Spiropali. Vetëm në 3 vitet e fundit nuk ka një dalje të saj që të ketë veshur një kostum ose një çantë dy herë. Për të mos folur për ministret e tjera të qeverisë, për të cilat në fakt më shumë se Ulsiu është kujdesur Sali Berisha t’u numërojë veshjet, këpucët, çantat, madje të bëhet dhe ekspert markash të shtrenjta.
Ky në fakt duket të jetë shndërruar në një problem cic-mici mes deputetëve të Parlamentit dhe politikës shqiptare që sa herë kanë ndonjë luftë personale mes tyre përdorin çantat e grave dhe kollaret e burrave për t’u marrë, ndërkohë që elefanti në dhomë apo incineratori në mes të fushës prodhojnë miliona që futen në xhepat e ministrave që Ulsiu as i sheh dhe as i përmend.
Saliu, Ulsiu, Elisa dhe të ngjashem me ta bëjnë mirë që të na i kursejnë dhe akuzat dhe shfaqjet me veshje të shtrenjta elegante. Sa për akuzat e dimë mirë që i kanë sa për të larë gojën, se do puthen e përqafohen sa të mbarojë seanca, e sa për veshje e shije dukeshin më mirë kur hynë në politikë e të veshur thjeshtë se tani që japin leksione estetike me rroba të blera cash… se me kartë krediti s’ua mban nga SPAK-u.
