Kryetari i Komisionit të Ligjeve, Ulsi Manja, ka komentuar ditën e djeshme për herë të parë raportin përfundimtar të OSBE/ODIHR për zgjedhjet parlamentare të 11 majit, i cili në disa pjesë kritikon Partinë Socialiste për përdorimin e administratës publike dhe sistemin e patronazhimit gjatë fushatës. Manja pranoi se gjetjet e raportit përputhen me ato që Partia Demokratike kishte ngritur menjëherë pas zgjedhjeve.
“Përsa i përket konstatimeve, janë ato që, besoj, pas 11 majit i di çdo shqiptar, sepse janë theksuar nga opozita jo një, por disa herë, edhe në seancë plenare”, u shpreh ai, duke kaluar më pas tek pjesa e rekomandimeve të raportit.
Në mbledhjen e përbashkët të Komisionit të Ligjeve dhe atij për Nismat Qytetare, Bashkëpunimin dhe Mbikëqyrjen Institucionale, u miratuan gjashtë rezoluta për institucionet e drejtësisë, Komisionin e Prokurimit Publik dhe Administratën Publike, të cilat u kundërshtuan nga deputetët demokratë. Të hënën, në orën 10:00, institucionet e drejtësisë do të raportojnë në seancë plenare, ku deputetët do të kenë mundësi t’u drejtojnë pyetje për rreth 150 minuta.
