Kompania amerikane e lobimit Continental Strategy, e kontraktuar nga Sali Berisha përpara zgjedhjeve të 11 majit, i është drejtuar Departamentit Amerikan të Shtetit me kërkesën për të anuluar shpalljen “non grata” ndaj liderit të Partisë Demokratike.
Në një material të përgatitur për institucionet amerikane, kompania e afërt me rrethin politik të Partisë Republikane dhe ish-presidentin Donald Trump, argumenton se shpallja e Berishës si person i padëshiruar ishte e motivuar politikisht dhe pa bazë faktike.
“Shpallja sipas nenit 7031(c) e ish-Presidentit dhe ish-Kryeministrit të Shqipërisë, Sali Berisha, duhet të hiqet menjëherë. Ajo dëmtoi interesat e politikës së jashtme të SHBA-së dhe kontribuoi në përkeqësimin e situatës në Shqipëri, që sot kritikët e përshkruajnë si një ‘shtet-narkotik’. Ndërsa demokracia në vend është nën kërcënim serioz dhe Berisha nuk është më një figurë aktive politike, heqja e shpalljes do të rikthente neutralitetin dhe besueshmërinë amerikane në rajon,” thuhet në dokument.
Continental Strategy ka nënshkruar një kontratë afatgjatë me Partinë Demokratike të Shqipërisë, me një vlerë deri në 6 milionë dollarë. Përmes kësaj marrëveshjeje, ajo ofron shërbime lobimi dhe strategji politike me qëllim përmirësimin e imazhit ndërkombëtar të PD-së dhe fuqizimin e pozicionit të saj në Uashington.
