Komisionet parlamentare miratuan vetëm me votat e mazhorancës një nismë ligjore që parashikon transferimin e tenderave të Agjencia Kombëtare e Shoqërisë së Informacionit (AKSHI) tek një shoqëri aksionere me kapital publik dhe privat, ku shteti do të zotërojë të paktën 51% të aksioneve. Sipas projektligjit të propozuar nga deputeti socialist Erjon Malaj, AKSHI nuk do të kryejë më prokurime dhe kontrata mirëmbajtjeje për platformat digjitale, por këto do t’i kalojnë kompanisë së re TIK.
Opozita e kundërshtoi ashpër nismën, duke e lidhur atë me hetimet e SPAK për abuzime me tenderat në AKSHI. Sipas tyre, ndryshimet vijnë pas zbulimit të një grupi të strukturuar kriminal që dyshohet se kontrollonte tendera me vlera të mëdha, ku janë marrë të pandehur edhe ish-drejtues të agjencisë dhe biznesmenë të përfshirë në çështje.
Deputetët e opozitës ngritën shqetësime për sigurinë kombëtare dhe mbrojtjen e të dhënave sensitive, duke kërkuar audit të thelluar financiar dhe teknik para çdo transferimi. Ata paralajmëruan se kalimi i infrastrukturës kritike digjitale në administrim të një shoqërie me pjesëmarrje private mund të krijojë precedent të rrezikshëm dhe të cenojë standardet e transparencës dhe integrimit europian.
Nga ana tjetër, Malaj dhe përfaqësues të qeverisë argumentuan se ndryshimet janë të nevojshme për zhvillimin teknologjik dhe për ndarjen e qartë të funksioneve mes pronësisë publike dhe operimit teknik. Sipas tyre, institucionet publike do të mbeten pronare të sistemeve, ndërsa shoqëria e re do të merret me operimin dhe mirëmbajtjen, pa cenuar sigurinë e të dhënave apo kompetencat thelbësore të AKSHI-t.
