Projektligji për reformën në diplomaci u shty nga rendi i ditës në seancën e sotme plenare. Me kërkesë të Partisë Socialiste, ai u tërhoq për shkak të mungesës së ministres së Jashtme, Elisa Spiropali. Një akt i konsideruar si ndër më të rëndësishmit për organizimin dhe funksionimin e shërbimit të jashtëm mbetet kështu pa u shqyrtuar, në pritje të një date të re.
Shtyrja vjen një ditë pas pranisë së Spiropalit në Vjenë, ku ishte e ftuar në Balon e Operës Shtetërore, eventi më i madh social i vitit në Austri. Sipas medias austriake Politik Live, ministrja e Jashtme e Austrisë, Beate Meinl-Reisinger (Neos), është e vetmja politikane e qeverisë që kishte një lozhë të sajën në këtë mbrëmje, ku do të priste mysafirë shtetërorë nga Filipinet dhe Shqipëria. Nga pala shqiptare, e ftuar ishte pikërisht Elisa Spiropali.
Sipas rregullave të organizimit, lozhat falas i takojnë vetëm Presidentit Federal dhe Kancelarit. Të gjitha lozhat e tjera financohen nga vetë pjesëmarrësit. Çmimet këtë vit kanë qenë rekord: një lozhë në ballkon kushton 26 mijë euro, ndërsa një biletë hyrjeje arrin në 410 euro. Presidenti Alexander Van der Bellen dhe bashkëshortja e tij Doris Schmidauer përfaqësuan presidencën e shtetit, ndërsa Kancelari Christian Stocker (ÖVP) mungoi për shkak të një angazhimi në Bruksel, por u zëvendësua zyrtarisht në ceremoni.
Në të njëjtën kohë, në Tiranë pritej votimi i ligjit për Shërbimin e Jashtëm, një nga aktet që prek drejtpërdrejt organizimin, karrierën dhe funksionimin e diplomacisë shqiptare. Në praktikë, kjo do të thotë se ministrja e Jashtme ndodhej në një mbrëmje gala me muzikë klasike pikërisht në ditën kur Parlamenti do të duhej të diskutonte reformën që lidhet me institucionin që ajo drejton.
Kështu, ndërsa në Vjenë valset e Strauss-it jehonin nga një lozhë 26 mijë euro, në Tiranë reforma në diplomaci mbeti në pauzë. Ligji që do të riformatojë shërbimin e jashtëm nuk u votua. Dhe për momentin, diplomacia shqiptare ka më shumë një shtyrje sesa një reformë të miratuar.
