“Kërkojmë ndjesë për mënyrën fyese se si një ligj shumë fisnik, plotësisht në përputhje me parimet e BE-së për barazinë gjinore dhe mosdiskriminimin, është keqpërdorur për të shtrembëruar perceptimin publik, si dhe për mënyrën se si Ambasadori i BE-së është shfrytëzuar për një qëllim kaq të ulët”, do të deklaronte Rama në përmbyllje të votimit te ligjit të shumëdiskutuar disa javë më parë.
Protestat kundër projektligjit “për barazinë gjinore”, u organizuan ndërsa ligji po diskutohej në seancë parlamentare. Shoqata të ndryshme por dhe deputetë të opozitës kundërshtuan miratimin e tij.
Dhjetëra qytetarë, por edhe përfaqësues të organizatave të ndryshme dhe aktivistë, u mblodhën para selisë së sallës së seancave plenare të Kuvendit të Shqipërisë, gjatë kohës që po fillonte seanca plenare.
Me pankarta me mbishkrimet, “projektligji i barazisë gjinore është i barabartë me antifamilje”, “Ka vetëm dy gjini, mashkull dhe femër”, “Deputetë, do të mbetet në histori vota jote sot”, “Projektligji i barazisë gjinore, armiqësi kundra besimit”, “Shqiptarët kundër edukimit gjinor në shkolla”, protestuesit u bënë thirrje deputetëve mos ta votojnë projektligjin.
“Sidoqoftë, siç themi shqip, qentë le të lehin, karvani ecën përpara”, deklaroi kryeministri i Shqipërisë.
Sot në përmbyllje të afatit të dekretimit, Presidenti heshti dhe e la karvanin të shkojë pa bërë shumë zë.
